မြန်မာနိုင်ငံရဲ့ ပထ၀ီနိုင်ငံရေး အနေအထားကို ပြန်ကြည့်ပါ ။ လူသန်းပေါင်း (၁၂၀၀)ကျော်၊ သန်းပေါင်း (၁၀၀၀)ကျော်၊ သန်းပေါင်း (၁၄၀) လောက် များပြားတဲ့ နိုင်ငံတွေ အကြားမှာ လူဦးရေ သိပ်သည်းမှု မရှိလှဘဲ တည်ရှိနေတဲ့ မြန်မာနိုင်ငံအနေနဲ့ လူဦးရေ ဖိအားကို အမြဲတစေ စိုးရွံ့ သတိထား နေရမှာ ဖြစ်ပါတယ်။ မိမိနိုင်ငံကို စည်းစည်းလုံးလုံးနဲ့ ကျစ်ကျစ်လစ်လစ် ကာကွယ် နိုင်မှသာ မြန်မာနိုင်ငံဆိုတာ ရေရှည် သက်ဆိုးရှည်နိုင်မှာ ဖြစ်ပါတယ်။ ဒါ့ကြောင့် အမျိုးသား စည်းလုံး ညီညွတ်ရေးဟာ မရှိမဖြစ် လိုအပ်ချက် ဖြစ်ပါတယ်။
နိုင်ငံတော် မြေမျက်နှာ သွင်ပြင် အနေအထားကို ကြည့်မယ်ဆိုရင် လူနေထူထပ်တဲ့ မြစ်ဝှမ်းဒေသများကို ၀န်းရံကာကွယ်ထားတဲ့ တောင်တန်းများက မြန်မာနိုင်ငံကို သဘာဝခံတပ်သဖွယ် ကာကွယ်ပေးထားတဲ့ အတွက် လွန်ခဲ့တဲ့ နှစ်ပေါင်း ထောင်ပေါင်း များစွာ အတွင်း ဘေးပတ်ဝန်းကျင်မှ အင်အားကြီး နိုင်ငံကြီးများရဲ့ ကျူးကျော်လွှမ်းမိုးမှုကို မခံခဲ့ရခြင်းဘဲ ဖြစ်ပါတယ်။ ဒါ့ကြောင့် လုံခြုံရေးအရ မြေပြန့်ဒေသများအတွက် တောင်တန်းဒေသဟာ သဘာဝခံတပ် မြို့ရိုးကြီး သဖွယ် ဖြစ်ပါတယ်။ တောင်တန်းဒေသများ အနေနဲ့လည်း ဆန်၊ ဆီ၊ ဆား အဓိက စားနပ်ရိက္ခာ များက အစ အထွေထွေ လူသုံးကုန် ပစ္စည်းများ အားလုံးအတွက် မြေပြန့်ကနေ ရယူနေရတာ ချည်းပဲ ဖြစ်လို့ မြေပြန့်ဒေသ မပါဘဲလည်း တောင်တန်းဒေသတစ်ခုတည်း မရပ်တည် နိုင်ပါဘူး။
ဒါ့အပြင် တောင်တန်း ဒေသ ပြည်နယ်များ ခွဲထွက်သွားလျှင်လည်း land locked ကုန်းပိတ်နိုင်ငံငယ်များ အဖြစ်ပဲ ဖြစ်လာမှာ ဖြစ်လို့ မြန်မာနိုင်ငံကို မမှီခိုရလျှင် အခြား တစ်ဖက်တစ်ချက်က နိုင်ငံကြီးများကို မှီခိုအားကိုး ရတော့မှာပဲ ဖြစ်ပါတယ်။ အဲဒီအခါမှာတော့ မှီခိုသူအား အမှီခိုခံသူက လွှမ်းမိုးလာမှာပဲ ဖြစ်ပါတယ်။ လူဦးရေ သန်းရာထောင်ချီရှိနေပြီး လူဦးရေ သိပ်သည်းမှု များလှတဲ့ နိုင်ငံကြီးကို မှီခိုရတဲ့ လူဦးရေကြဲ၊ အားနည်းလှတဲ့ နိုင်ငံပေါက်စနကလေး တစ်ခုရဲ့ ဘ၀ဟာ မြေမမျိုဘဲ လူမျိုခံရတဲ့ အဖြစ်ကို အနှေးနဲ့ အမြန် ဆိုက်ရောက်သွားရမယ် ဆိုတာ မလွှဲပါဘူး။ ဒါ့ကြောင့် တောင်တန်းဒေသ ပြည်နယ်များ အနေနဲ့လည်း ကိုယ့်လူမျိုး၊ ကိုယ့်ယဉ်ကျေးမှု မပျောက်မပျက် ထိန်းသိမ်းလိုတယ်ဆိုရင် လူအင်အား အသင့်အတင့်ရှိတဲ့ မြေပြန့်ဒေသနဲ့ မခွဲမခွာ စတမ်း ပေါင်းစည်းထားရမယ် ဆိုတာကလည်း မရှိမဖြစ် လိုအပ်ချက် တစ်ရပ်ပဲ ဖြစ်ပါတယ်။ ဒါ့ကြောင့် ပထ၀ီနိုင်ငံရေး အနေအထားက ခွဲထွက်ခွင့်ကို လုံးဝမလုပ်သင့်ကြောင်း ပြဌာန်းလျက် ရှိတယ်လို့ တွေ့ရပါတယ်။
နိုင်ငံရေး အချက်အလက်မှာ ဒီပထ၀ီနိုင်ငံရေးဟာ အခြေအမြစ် အကျဆုံးနဲ့ အပြောင်းအလဲ အနည်းဆုံး ဖြစ်ပါတယ်။ နိုင်ငံရေး စနစ်အားလုံးကို လွှမ်းမိုးပြီး သြဇာ အသက်ရောက်ဆုံးလည်း ဖြစ်ပါ တယ်။ ပထ၀ီနိုင်ငံရေးရဲ့ ပြဌာန်းချက်များဟာ မှားခဲပါတယ်။ ဒါ့ကြောင့် ခွဲထွက်ခွင့်ဆိုတာ စိတ်ကူးပင် မယဉ်ကောင်းတဲ့ အရာလို့ ကျွန်တော် ထင်မြင်မိပါတယ်။
No comments:
Post a Comment